افضل طريقه لتحصيل شيكات كليك بانك فى مصر

السلام عليكم ورحمه الله وبركاته

اليوم ياجماعه هاتكلم عن موضوع مهم جدا يهم كل المصريين  اللى بيعملوا فى التسويق  او فى اى مجال ربحى على الانترنت وبيكون وسيله الدفع الوحيده ليهم هى الشيكات

اغلب الشباب المصري بجد بيعانى فى حاله وصله شيك من الخارج بالدولار ومحتاج يصرفه

وانا واحد من اكتر الناس اللى عانوا فعلا من الامر ده

وللاسف عملت بحث كتير علشان اشوف حد بيتكلم عن الموضوع ده واغلب اللى لقيته  مش بيشرحه بالتفصيل اللى هاشرحهلكوا ده ان شاء الله

وطبعا اغلبهم  ماعندوش مشاكل فى كيفيه التحصيل لانهم اصلا  يقدروا يفتحوا حساب جارى بالدولار

وطبعا  الكل لازم يعرف المعلومه المهمه دي بجد

مافيش بنك هايصرفلك اى شيك الا لما تفتح حساب عنده ومش اى حساب طبعا

لازم يكون حساب جارى وبالدولار

وطبعا ده تكلفته بتكون عاليه وخصوصا فى ظل هذه الظروف 

وانا هاضربلكم امثله لااهم البنوك فى مصر اللى روحتلهم وعانيت معاهم

اولا

مثلا  اسهل بنك فى التعامل وسريع جدا على حسب معلوماتى هو بنك cib وده علشان  تحصل عليه وتفتح فيه حساب جارى لازم يكون معاك  تقريبا 5الاف دولار 

البنك التالى وهو ايضا سهل وسريع وممكن يكون  ارخص بنك فيهم تقريبا

هو بنك كريدي ايجريكول

الحساب بيتفتح بالف دولار

والبنك الاخير اللى هاتكلم عنه النهارده هو بنك nsgb وطبعا البنك ده طلع افضلهم  مرونه فى التعامل واى حد يقدر يفتح فيه حساب  جارى  تكلفته 2500دولار

بس  الجميل فى بنك nsgbانك تقدر تفتح فيه حساب توفير بالدولار ويقبل انه يحصلك الشيكات على حسابك التوفير

وده بيكلفك الف دولار فقط

فى معلومه تانيه مهمه جدا جدا جدا

كل البنوك للاسف مش بتفتحلك اصلا حساب جارى الا بشروط

اهم شروطهم ان البطاقه بتاعتك يكون مكتوب فيها انك حاصل على مؤهل او انك صاحب عمل وطبعا معاك سجل تجارى  وطبعا انا مش شايف اى مبرر للتعامل بالشكل ده اصلا وخصوصا  فى مصر لاننا كلنا عارفين كويس جدا الظروف اللى مرت بيها مصر فى خلال  ال 60 سنه اللى فاتوا

المهم بنك واحد  بس اللى فيه مرونه فى التعامل بجد وانا عن نفسي حبيته وطبعا فتحت فيه حساب وطلبت احصل عليه اول شيكين استلمتهم من كليك بانك

لان اول شيك وصلنى كان بتاريخ 11_4_2012 وطول الفتره دي وانا باالف ومش عارف احصله من اى بنك لان المبالغ اللى طالبينها طبعا خرافيه بالنسبالى

والشيك بجيلك بيكون  عندك 90 يوم تقدر تصرف الشيك فى خلال هذه الفتره

والشهر التالى جيه ووصلنى تانى شيك  فاضطريت انزل الف تانى واعمل محاولات عديده بعد طبعا ماجهزت  الف دولار  روحت بنك nsgb وبصراحه من افضل البنوك اللى روحتها وسهوله فى التعامل بجد

وخلصت الاجراءات فى اقل من نص ساعه والجميل انه مش مهم تكون موظف او مؤهل  او عندك سجل تجارى زي باقي البنوك بصراحه البنك ده فى منتهى  الجمال وطلبت تحصيل الشيكات وتم المطلوب وطبعا الشيك بياخد فتره من  عشر ايام لشهر علشان يتحصل

المعلومات دي بجد مش لاقيت حد بيشرحها بالتفصيل للاسف

وانا حبيت انى اشرحها علشان كل الشباب  اللى قرر  يعمل فى مجال التسويق يكون عارف الخطوات من دلوقتى ويحاول يجهز نفسه قبل مايوصله اول شيك

ومش يواجهكم المشاكل اللى واجهتنى وحجم المعاناه  تخيل كل بنك تروحه تاخد رقم وتفضل منتظر فتره كبيره  وفى الاخر يسدوا نفسك ويرفضوا يفتحولك حساب لاحد الاسباب اللى زكرتها

واى حد عنده اى استفسار انا تحت امره فى اى وقت

وباتمنالكم يارب التوفيق وتحقيق ارباح خياليه علشان نثبت لبلدنا دي اننا مش محتاجين منهم اى حاجه غير انهم ييسرولنا الامور شويه ويبطلوا  يعاملونا على اننا عبيد او مجرمين وبجد كل السياسات المصرفيه فى مصر عاوزه تتغير تماما  والا هانفضل طول عمرنا متخلفين للاسف

فى امريكا الكلب بيفتحولوا حساب وبيطلعوا ليه فيزا كارت

فى مصر باتمنى يعاملونا  معامله الكلاب  هههههههههههه فى امريكا

سامحونى طبعا على انفعالي بس ربنا مايوريكم حجم المعاناه مع سياساتهم الغبيه